Ya, kenderc’hel a ra an dispriz hag an dismegañs war ar brezhoneg a-berzh ar Stad-C’hall ! Penaos lavarout an traoù mod- all pa nac’her d’ur familh skrivañ mat anv-bihan ur paotrig ? Goude un trec’h dirak lez-varn an Oriant, ar prokulor n’en deus ket kavet gwell eget kas an afer dirak lez-engalv Roazhon ! Mantrus eo evit ar familh eveljust hag evit an holl re tomm ouzh hor yezh a ranko gortoz mizioù ha mizioù a-raok gouzout da vat hag eñ o deus ar gwir da skrivañ mat Fañch gant un tildenn !
Lavaret en doa lez-varn an Oriant ne oa ket an anv-bihan-se kontrol d'ar yezh c'hallek a anavez an tildenn hag ouzhpenn n'eo ket an tildenn evit ober drouk da vrud ha da vuhez ar paotrig bihan. Difennet gant ar breutaer Iannis Alvarez, ar familh a c’hortoze pell ‘zo e vefe barnet an afer. Maer an Oriant en doa asantet e vefe lakaet an tildenn war an anv-bihan Fañch met eveljust prokulor ar Republik en doa savet a-enep raktal ha kaset an afer dirak ar justis. Goude barnadenn an Oriant dek devezh en doa ar prokulor evit ober galv. Graet eo ! Evel ma lavare maer An Oriant «moarvat en deus al lez-varn kalz traoù all d’ober ha gwell vefe dezhañ paouez gant ur seurt emzalc’h a-enep an tildenn… ». Breutaer ar familh, Iannis Alvarez a lavare kemend all en ur resisaat ez eo tremen poent cheñch ar c’helc’h-lizher a zifenn da implij an ñ. Da c’hortoz e vo dav d’ur familh mont dirak lez- engalv Roazhon evit difenn he gwirioù ha da Skoazell Vreizh diyalc’hañ ur wech ouzhpenn. Piv a gemero an intrudu da lavarout da Gerald Darmanin, ministr ar Justis, eo tremen poent cheñch ar c’helc’hlizher diamzeriet a nac’h digemer an tildenn ? Prezidant «Rannvro » Breizh en deus ken nebeud a levezon,a nerzh politikel pe a startijenn pa ne c’hell ket zoken lakaat ur c’helc’hlizher da vezañ kemmet ? Dirak an taolioù niverus a vez paket ar mare-mañ e Breizh an Emsav a seblant bezañ seizet, lor... An dihun a c'hellfe bezañ diaes avat !
Yann Milvich
Comments